🏆 ការប្រកួតប្រជែងសិស្សពូកែប្រចាំឆ្នាំ២០២៦ របស់អង្គការ ស៊ីថេប បានបញ្ចប់ដោយជោគជ័យ!

កម្មវិធីប្រកួតប្រជែងសិស្សពួកែ ប្រចាំឆ្នាំរបស់អង្គការ ស៊ីថេប បានប្រមូលផ្តុំសិស្សឆ្នើមមកពីមណ្ឌលសិក្សារបស់យើង ដើម្បីបង្ហាញពីចំណេះដឹង ជំនាញ ភាពច្នៃប្រឌិត និងទំនុកចិត្តរបស់ពួកគេ តាមរយៈការប្រកួតប្រជែងលើ ៤ វិញ្ញាសា។

នៅក្នុងឆ្នាំនេះ កម្មវិធីបានទទួលស្វាគមន៍អ្នកចូលរួមសរុបចំនួន ១២៩ នាក់ រួមមានសិស្សានុសិស្ស អាណាព្យាបាល គ្រូបង្រៀន អាជ្ញាធរពាក់ព័ន្ធនៅតាមមណ្ឌលនីមួយៗ និងភ្ញៀវកិត្តិយស។

មណ្ឌលសិក្សាមួយចំនួនបានធ្វើដំណើរមកពីទីតាំងឆ្ងាយៗ រួមមានខេត្តព្រះសីហនុ រាជធានីភ្នំពេញ និងក្រុងបាវិត។ យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះសិស្សានុសិស្ស និងលោកគ្រូ អ្នកគ្រូទាំងអស់ ដែលបានចំណាយពេលវេលា និងធ្វើដំណើរផ្លូវឆ្ងាយ ដើម្បីមកចូលរួមក្នុងកម្មវិធីនេះ។ នេះគឺជាឱកាសដ៏ល្អមួយសម្រាប់សិស្សានុសិស្សមកពីសហគមន៍ផ្សេងៗគ្នា បានជួបជុំគ្នា ផ្លាស់ប្តូរយោបល់ និងរៀនសូត្រពីគ្នាទៅវិញទៅមក។

ការប្រកួតប្រជែងលើ ៤ វិញ្ញាសា

ភាសាអង់គ្លេស (English)

កុំព្យូទ័រទូទៅ (General Computer)

ការសរសេរកម្មវិធី (Coding)

មនុស្សយន្ត (Robotics)

ក្រៅពីការប្រកួតប្រជែង សិស្សានុសិស្សក៏បានបង្ហាញស្នាដៃគម្រោងថ្នាក់កូដ របស់ពួកគេ និងបង្ហាញសមត្ថភាពនិយាយភាសាអង់គ្លេសតាមរយៈការធ្វើបទបង្ហាញនៅលើឆាកផងដែរ។

យើងខ្ញុំក៏មានសេចក្តីសោមនស្សរីករាយដែលបានទទួលស្វាគមន៍តំណាងមកពីវិទ្យាស្ថានពហុបច្ចេកទេសតេជោសែនសៀមរាប និងមជ្ឈមណ្ឌលការងារខេត្តសៀមរាប ដែលបានចែករំលែកព័ត៌មានសំខាន់ៗអំពីឱកាសបន្តការសិក្សា ការបណ្តុះបណ្តាលវិជ្ជាជីវៈ និងឱកាសការងារនាពេលអនាគត ជូនដល់សិស្សានុសិស្ស និងមាតាបិតា។

សូមអបអរសាទរដល់ម្ចាស់ជ័យលាភីទាំងអស់!

វិញ្ញាសាភាសាអង់គ្លេស (English)

ចំណាត់ថ្នាក់លេខ១៖ តាស្នែ (មណ្ឌលសិក្សាដែលគ្រប់គ្រងដោយ ស៊ីថេប ខេត្តសៀមរាប)

ចំណាត់ថ្នាក់លេខ២៖ ស្ទឹងព្រះស្រុក (មណ្ឌលសិក្សាដែលគ្រប់គ្រងដោយ ស៊ីថេប ខេត្តសៀមរាប)

ចំណាត់ថ្នាក់លេខ៣៖ សាលាសៀមរាបពន្លឺថ្ងៃ (មណ្ឌលសិក្សា Sunshine ឧបត្ថម្ភដោយលោក សៅ​)

វិញ្ញាសាកុំព្យូទ័រទូទៅ (General Computer)

ចំណាត់ថ្នាក់លេខ១៖ រកា (មណ្ឌលសិក្សាដែលគ្រប់គ្រងដោយ ស៊ីថេប ខេត្តសៀមរាប)

ចំណាត់ថ្នាក់លេខ២៖ តាស្នែ (មណ្ឌលសិក្សាដែលគ្រប់គ្រងដោយ ស៊ីថេប ខេត្តសៀមរាប)

ចំណាត់ថ្នាក់លេខ៣៖ ស្ទឹងព្រះស្រុក (មណ្ឌលសិក្សាដែលគ្រប់គ្រងដោយ ស៊ីថេប ខេត្តសៀមរាប)

វិញ្ញាសាសរសេរកម្មវិធី (Coding)

ចំណាត់ថ្នាក់លេខ១៖ តាយ៉ែក (មណ្ឌលសិក្សាដែលគ្រប់គ្រងដោយ ស៊ីថេប ខេត្តសៀមរាប)

ចំណាត់ថ្នាក់លេខ២៖ ជម្ពូវ័ន (វិទ្យាល័យចំណេះទូទៅនិងបច្ចេកទេសជម្ពូវ័ន រាជធានីភ្នំពេញ)

ចំណាត់ថ្នាក់លេខ៣៖ ខេ ឌី អិម អ (មណ្ឌលសិក្សាដែលទទួលការឧបត្ថម្ភពី ខេ ឌី អិម អ)

វិញ្ញាសាមនុស្សយន្ត (Robotics)

ចំណាត់ថ្នាក់លេខ១៖ ព្រះសីហនុ (វិទ្យាល័យចំណេះទូទៅនិងបច្ចេកទេសក្រុងព្រះសីហនុ)

ចំណាត់ថ្នាក់លេខ២៖ រកា (មណ្ឌលសិក្សាដែលគ្រប់គ្រងដោយ ស៊ីថេប ខេត្តសៀមរាប)

ចំណាត់ថ្នាក់លេខ៣៖ បាវិត (វិទ្យាល័យចំណេះទូទៅនិងបច្ចេកទេសបាវិត)

សូមថ្លែងអំណរគុណចំពោះអ្នកឧបត្ថម្ភរបស់យើង!

យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះ ខេ ឌី អិម អ, អ៊ីលិត និងលោក សៅ ដែលបានផ្តល់ការឧបត្ថម្ភជាអំណោយ និងរង្វាន់យ៉ាងសប្បុរស ដើម្បីលើកទឹកចិត្ត និងផ្តល់ការលើកតម្កើងដល់សិស្សានុសិស្សដែលទទួលបានជ័យលាភី។

ការប្រកួតប្រជែងនីមួយៗ គឺជាឱកាសសម្រាប់សិស្សានុសិស្សបង្ហាញនូវអ្វីដែលពួកគេបានរៀនសូត្រ។ អ្វីដែលសំខាន់ជាងនេះទៅទៀត គឺការចូលរួមប្រកួតម្តងៗ បានផ្តល់នូវបទពិសោធន៍ថ្មីៗ ការរីកចម្រើន និងការអភិវឌ្ឍសមត្ថភាពរបស់ពួកគេ។

ចំពោះសិស្សានុសិស្សដែលមិនទាន់ទទួលបានជ័យលាភីនៅក្នុងឆ្នាំនេះ សូមកុំបាក់ទឹកចិត្ត! ជោគជ័យមិនមែនស្ថិតនៅលើការឈ្នះតែមួយមុខនោះទេ ប៉ុន្តែស្ថិតនៅលើអ្វីដែលយើងបានរៀនសូត្រ និងការរីកចម្រើនដែលយើងសម្រេចបានតាមដំណើរនៃការសិក្សា។

សូមអរគុណដល់សិស្សានុសិស្ស លោកគ្រូ អ្នកគ្រូ អាណាព្យាបាល និងដៃគូសហការទាំងអស់ ដែលបានចូលរួមចំណែកធ្វើឱ្យកម្មវិធីនេះទទួលបានជោគជ័យ!

យើងខ្ញុំរង់ចាំជួបអ្នកទាំងអស់គ្នាម្តងទៀតនៅក្នុងកម្មវិធីប្រកួតប្រជែងសិស្សពូកែឆ្នាំ២០២៧!